Sesongslutt: - Ballen smaka godt!
- Historia vår er umisteleg. Flott at den blir formidla vidare! Mange kom med rosande ord da historielaget i Bøfjorden runda av sin 32. sommarsesong med tradisjonell sildballfest og historieglimt søndag.
At sildball har gått frå fattigmannskost til festmat, viste seg for fullt. Det var fullsett rundt borda - av gjestar frå fjern og nær. – Og ballen smaka godt! var ein hyppig kommentar.
Sletta-prologen
Eit biletkåseri med glimt frå forskjellige utgåver av årboka «Gamle Nordmør» var nettopp formidling av umisteleg lokalhistorie. Bureisinga i Sletta starta på 1940-talet da familiar flytta inn i høyløer og seterskjel og «brøytte seg rydning», som visa seier. Johnse Sættem sin prolog ved 50-årsjubileet i 1990 sette ord på innsatsen.
Hundre år med dampen
Dampbåtane batt Nordmøre saman i hundre år frå 1850-talet. Hjuldamparen «Nordmør» vekte oppsikt – også ved at den etter forliset ved Stangvika i 1863 vart «brakt flott» av geniet Nils Sæterøy – ved hjelp av tomtønner. Dampsluppen «Beta» endte sine dagar som vrak og «leikebåt» for ungane på Bølandet.
Ulike minne
Glimt frå krigen, der tre unge frå noverande Surnadal sette livet til, var minne som aldri skal glømmast.
Da lokalbandet «Styrbord» dukka opp på lerretet, kunne historielagets Inge Dønheim fortelje om si fartstid som songar og gitarist i gruppa for 40-50 år sia.
Serien var også innom 80 år med samvirkebutikk på Bølandet og påminte om at den må brukast for ikkje å forsvinne.
Frå Sjøflot til Liverpool
Og tenk at restane av segljakta «Flora», bygd på Sjøflot rundt 1890 – til no har vore å sjå utafor Liverpoo! Som slofartskute, fraktebåt, restaurert seglar (i Gibraltar og på Middelhavet) og som cruiseskip på Mersey attmed fotballbyen fekk skuta hans August Sjøflot litt av ein karriere!
Torvikstua på Åsen
Under tittelen «Hus på flyttefot» fekk publikum følgje den noverande Røykjestua på Surnadal Bygdemuseum frå Torvika, der ho vart reist i 1761 via Stangvika (som bygdemuseum der) og til Åsen, der ho no står. Bilete frå 1988, da Bøfjorden skule arrangerte «Jul i Røykjestua» gjorde særleg inntrykk. Den gong inviterte skulen nemleg både Gjertrud Hamnes (fødd 1903), Marit Settem (fødd 1905) og Gunda Næss (fødd 1914) på kaffe og fattigmann i stua der dei alle hadde vakse opp den gong stua stod i Torvika!
Historia talar
På eit museum som dette talar historia frå veggane. Somme kjente att utstyr frå skredderiet i Settemsdalen. Unge Kaia og Kristen fekk lyst til å tegne utstilte skuter. At samlinga også har ei «kofte» som var med i storfilmen «Same Jakki» (1957), måtte forklarast: Gåve frå Ole Flessen, som i si tid fekk den av ein som deltok i filmen.
Påskjønning
Frå museets trufaste publikum, og med støtte av Blomstermakeriet Orkideen i Surnadal, overrekte Øyvind Magnor Bøe ei gåve til leiinga i Bøfjorden Historielag som takk for arbeidet med søndagsopne program på sjøbruksmuseet kvar sommar. Med ståande applaus støtta dei frammøtte denne takken for formidling av lokalkulturen – noko mange framheva.
Trekning
Eit høgdepunkt på avslutningsdagen var trekninga av sommarutlodinga 2026. Historielaget, og dermed museet, har ikkje fast offentleg stønad. All drift skjer på dugnad. Midlar til strøm, forsikring og andre nødvendige utgifter blir hovudsakleg skaffa ved kaffeservering, salg av årbok og ved utlodning.
Årets basar har gått bra, og styret takka for både gevinstar og loddkjøp. Mange kunne dra berika heim etter trekninga denne dagen!
Takk for felles dugnad
Styret takka elles dei mange temakåsørane denne sommaren. Ikkje mindre takk blir retta til dei bortimot tjue frivillige som har gjort kjøkenteneste – og sjøl skaffa kaffemat utan betaling. Dette kallast på godt bygdenorsk for dugnad!
Eit raskt overblikk over besøkstala syner at gjennomsnittleg eit halvt hundre menneske har besøkt Bøfjorden Sjøbruksmuseum kvar søndag sommaren 2026. Eit høgt tal i ei bygd med under 300 innbyggjarar.
… Innsendt av Bøfjorden Historielag …
Kommentarer