Tonande høgtid

Når koret P17 med solist og musikarar søndag 10. desember inviterer til kyrkjekonsertar i Todalen og Åsskard, er hovudsaka å dele litt av jula sin toneskatt med alle. Mange av songane gir den gode gjenkjenninga av kjær tradisjon. Samtidig har gruppa «henta heim» julemusikk som kan gi nye aha-opplevingar.

Allsong og solist

Allsong om «stille grender», «slekters gang» og «min hjertens Jesus» gjer forsamlinga til medaktør - med koret attåt.  

Tove Elin Strand (fløyte), Synnøve Hammervold (fiolin) og Tor Strand (orgel og piano) legg lys, spenst og klang til programmet.

Solist Turid Røen Kroknes syng tidenes advents-arie «Bereite dich» (Bered deg) frå Bachs Juleoratorium. 

Variert korprogram

Koret Prosjekt 17 byr på eit variert juleprogram, frå populære «Julenatt» og «Glade jul» i originalbunad til «Ave Maria» av Mendelssohn og sjølvaste «Hallelujakoret» frå Handels Messias.

«Julemotett» av Eyvind Alnæs er sjølsagt med  - i år som på julekonserten i Åsskard for 90 år sia.

Og kanskje blir du gripen av Zakarias Topelius si bøn om meir inderleg julefeiring - tonesett av sjølvaste Jean Sibelius under tittelen «Julvisa»?
 

Konserten kan du få med deg i Todalen kl. 15 og i Åsskard kl. 19.30.