Påskemesse med storinnrykk
Høgtidstonar og sterke tekster samla over hundre i Åsskard kyrkje langfredag.
Påskemusikk og scener frå Bibelen vart formidla av koret P17 saman med liturg Torbjørn Brøske, klokkar Randi Bøe, fiolinist Synnøve Hammervold og fløytist Tove Elin Strand.
Vandring i tekst og tonar
Messa var ei bibelsk og musikalsk vandring gjennom høgtida frå palmesøndag via skjærtorsdag og langfredag fram til påskemorgon. I sin tekstmeditasjon reflekterte Torbjørn Brøske over kva innhaldet i denne veka betyr – også for oss i dag.
Mest frå «Messias»
Randi Bøe sine bibellesingar vart understreka med tilsvarande salmar og klassisk vokalmusikk - mest henta frå Handels «Messias». I «Hyrdearien» skildra damestemmer frå koret Jesus som den gode hyrdingen. Solist Turid Røen Kroknes gav ei djupfølt tolking av Jesu lidelse i arien «Han var fornedret», spontant supplert av korsatsen «Sannelig - straffen lå på ham for at vi skal ha fred». Og det mektige «Hallelujakoret» vart uttrykk for påskegleda.
Instrument krydra songen
Eit innleiande «Hosianna» av Olivers og «Ave verum» (Heil deg, Herrens sanne lekam) av Elgar var også musikalsk formidling av sentrale ledd i messa. Dertil la koret eigne stemmer til allsongen. Fløyte, fiolin og piano (Bernt Bøe) gav tonefølgje til salmar og korverk.
Scenisk ramme
Evangeliesekvensen «Jesu Kristi Sju Ord på Korset» fekk ei enkel scenisk ramme, og salmen «Dine hender er fulle av blomster» vart til pantomime med vekselsong i kor og forsamling.
Utanom bibel- og salmetekster var ny, gripande poesi av Arnold Eidslott fletta inn i programmet gjennom korsong og diktlesing.
Felles påskemåltid
Kari Johanne Aarnes og Jane Nordstrand Svensli frå soknerådet hadde smurt brødskiver og sørga for mat og drikke til storselskapet i Kyrkjestua etter endt program
….. Innsendt av Bernt G. Bøe for Åsskard sokneråd ...
