Olsok og primstav på museet

Primstaven var gamle dagars kalender. Her var alle årets merkedagar – gjerne helgenminne – inntegna. Og lova påbaud feiring!

Tradisjonar lever

Om mykje no er glømt, heng tradisjonar att – kanskje ubevisst. Vi brenner enno jonsokbål, rindalingane har årleg kyndelsmessbasar og ungane går tog på Lucia-dagen.

Olavs-tradisjonar også hos oss

Programmet i Bøfjorden søndag vandrar med sjumilssteg primstav-året rundt, men stansar ved særlege dagar.  No ved olsoktider blir minnet om Heilag-Olav markert landet rundt. Kanskje var også Stangvika eit Olavs-senter? Og gjekk pilegrimsleia til Nidaros gjennom Lomunddalen?

Opplysning og oppleving

Historielaget bed folk bidra med opplysningar. Kunnskap blir repetert: Kva knyter seg til Trettanddagen? Når er den ideelle dagen å gifte seg på? Høyrt om «langfredagspåle»?

Ein biletserie og litt opplesing gir glimt av kva primstaven med olsok og andre merkedagar har hatt å seie opp gjennom tidene. Og enno har.

.............. Bernt G. Bøe / Bøfjorden Historielag ...........