«Jesu Sju Ord» som påskekonsert

Framføringane skjer i Kirklandet og Aure komande laurdag og i Ålvundeid og Øye søndag. Kvartetten består av Sara Øvinge og Sara Chen på fiolin, Anders Rensvik på bratsj og Ole Eirik Ree på cello.

Sara Øvinge jobbar til dagleg ved Den Norske Opera som 2. konsertmeister. Namnesøster Chen har si opplæring mest frå Barratt-Dues Musikkinstitutt og har fleire gonger sjarmert norsk TV-publikum. Begge mennene i kvartetten er nordmøringar. Anders Rensvik frå Frei (sønn av Peder) spelar i Oslo-Filharmonien, og Ole Eirik Ree (med aner i Surnadal) er førsteamanuensis ved Barratt-Due i Oslo. Han har doktorgrad i musikk frå USA, der han bl.a. studerte med cellolegenden Zara Nelsova.

Bibelsk bakgrunn

Dei klassiske «Jesu Kristi Sju Ord på Korset» er henta frå dei fire evangelia: - Fader, forlat dei! – I dag skal du vera med meg i Paradis! – Det er sonen din; det  er mor di! – Min Gud, kvifor har du forlate meg? – Eg tørstar! – Det er fullført! – I dine hender overgjev eg mi ånd!

Haydns tonesetting «Die sieben letzte Worte unseres Erlösers am Kreuze»  finst i ulike utgåver – for strykekvartett, orkester, kor eller klaver. Mellom satsane deklamerer Bernt Gudrunson Bøe si eiga gjendikting av Karl Ramlers dikt «Jesu Tod», som i si tid danna tekstgrunnlag for Haydns eigen korversjon.

Uttrykksfull tonekunst

Konserten byr på vakker musikk, sterke stemningar og tekster med ettertanke. Du møter den korsfeste saman med røvarane. Du får del i mor Marias fortvilte gråt. Du hører gjenklang av fortvilelsen, klagen, resignasjonen – og håpet. Alt gjennom uttrykksfull tonekunst av klassikkens «Fader Haydn».

«Jesu Kristi Sju Ord» var bruka liturgisk alt i mellomalderen. Komponistar som Schütz (1645), Haydn (1787), Cesar Franck (1859) og i nyare tid bl.a. russiske Sofia Gubaidulina og vår eigen Knut Nystedt har tonesett bibelorda. Sterkast og vakrast talar kanskje Joseph Haydn.