Laksevorpa som bok og kåseri
Atter bokaktuelle Einar Oterholm kåserer på Bøfjorden Sjøbruksmuseum søndag. Tema er «Kroknes Laksevorpe» – ei historie han no har samla mellom to permar.
Vorpa på Krokneset i Valsøyfjorden har den lengste samanhengande fangsttida her i landet.
– Ho var i drift frå 1400-talet til 2004! kan forfattaren opplyse. I år vart vorpa forresten gjenopna.
Eit oppgjer frå slutten av 1400-talet er blant grunnlagsdokumenta for historia. - Den er både komplisert og dramatisk, seier Oterholm og føyer til at Kroknes-vorpa gjennom tida har skifta eigarar og høyrt til fleire gardar på heile nordre Nordmøre.
- Eg kjem til å gå gjennom kva ei vorpe er for noko, korleis denne fungerer og ikkje minst hovudtrekka i historia.
Oterholm trur bestemt at det blir eit interessant kåseri - med illustrerande bilete. Og den rykande ferske boka blir å få kjøpt på museumesdagen.