Gløymde bygdekvinner og menn skal fram i lyset
Søndag hentar Bøfjorden Historielag fram profilar frå glømmeboka. Mange ukjente bygdekvinner og menn fortener sin plass i lyset.
Med foto og verbalt kåseri vil programmet på sjøbruksmuseet presentere kyrkjebyggjaren Ola Scheistrøen, den livlege forteljaren Ingeborg Sættem (Arnøra) og Johanna Staknes, som dreiv butikk i ingenmannsland og var omvandrande bokhandlar med koffert på ryggen!
Du møter forkynnaren og salmisten Jo Sengen frå Rindalen. Han kunne ikkje gå, men reiste vidt omkring – sittande i ei seng! Kanskje blir det litt om Edvind Strand – meister for både hotellbygg, kommunehus og husmorskule. Og kven var vår lokale Stradivarius?
Du visste nok at James Chaworth-Musters hadde Vaulen på Nordmarka. Men kva med krigsinnsatsen hans?
Kanskje får du med eit par prestehistorier av ymse slag – og småstubbar frå Halvdan Koht sitt Surnadals-besøk i 1905. For å nemne noko.
Det blir altså ymse attåt kaffen denne søndagen. Og den sørgjer Kirsten og Gunnhild for.