Fjorddag med høg tradisjonsfaktor
Bra ver, brukbart oppmøte og fartybesøk med høg tradisjonsfaktor prega årets fjorddag i Bøfjorden.
Hovudaktøren «Framnæs» med røter heilt tilbake til elveferjene på Missisippi, 60-årsjubilanten «Rapp», eks-redningsskøyta «Christiansund», kyrkjebåten «Hjelmkonnå» og den 140 år gamle «Fosnabåten» etter Ola Sakså skapte bølgande nostalgi og levande samtid rundt Ilabukta.
I tillegg sørga Bø Grendalag for kaffekos og stemning attmed Saga, den gamle kassefabrikken på Ilaneset. Også bygdefolk med sine fritidsbåtar bidrog til fin stemning på og langs fjorden.
Årets fjordcruise hadde også historiepreg. Ruta var lagt til Åsskardfjorden, der Bernt Bøe underheldt passasjerane på «Framnæs» med historikk om fjordliv og kyrkjefart - delvis med utgangspunkt i si nye bok «Kyrkja i Åsskard». Også «Christiansund», med Henning Bjerkestrand som skipper, følgde med på «kyrkjeturen».
«Fosnabåten», for tida utleigd av familien Tømmervåg til historielaget i Bøfjorden, var bemanna av folk frå Heggem, der den opprinneleg høyrde til. Synet av den flotte og velhaldne geitbåten gjorde inntrykk på folk langs kaier og strender. Derimot gjorde den like flotte, pur unge kyrkjebåten «Hjelmkonnå» lite av seg denne dagen.
Fjorddagen vart avslutta på sjøbruksmuseet, der Einar Sæter demonstrerte korleis dei historiske halvmodellane av seglskuter og skip danna grunnlag for fartybygging i si tid.
