Feira 80 - med kyrkjegardsdugnad!
Inger Bøe på Bølandet stikk seg ikkje fram i utide. Men ho er alltid med når sambygdingane møtest.
Tysdag stilte ho med riva og sitt gode humør på rakardugnaden ved Åsskard-kyrkja. At ho fylte 80 år same dagen, fekk koma i andre rekkje. - Gebursdagar kjem da kvart år, smilte ho.
Hurra-song og roser
Nokon i dugnadsgjengen hadde fått nyss om årsmålsdagen. Så ved kaffen etter arbeidsøkta vanka det både «Hurra for deg»-song og rosebukett til ein overraska og smilande jubilant. Og Inger ber åra sine lett – ikkje minst takka vere dagleg trim til Osen og andre turmål i Bøfjorden.
Rydda til vårens festdagar
Eit tjuetal frammøtte sørga – trass i vinden og ruskeveret - for rask og grei våronn rundt Åsskard-kyrkja denne ettermiddagen. Etterpå var det pølse, svele og kaffe i Kyrkjestua, der praten gjekk livleg som alltid.
Litt plenklipping står att. Men til 17. mai og til konfirmasjonen på Kristi Himmelfartsdag er kyrkjeområdet pynta til dobbel vårfest.
.... Tekst og foto Bernt Bøe ...
_3.jpg)
