Du fortener ros!
Leserinnlegg:
Vi nordmøringar er neppe dei flinkaste til følgje Bibelens oppfordring om å heidre kvarandre. Det sit langt inne å gi ros. Vi kunne kanskje like gjerne hatt adresse Jante som Rindal eller Bøfjorden.
Men vi har da så mykje å rose kvarandre for! Og no føre jul vil eg bøte litt på mi dårlege samvittighet. Eg møter dagleg så mange som vil meg vel - og gjer meg vel. Som kvar fortener både ros og roser!
Spør eg på facebook om nokon skal hit frå Kristiansund og kan ta med ein pakke så eg slepp å kjøre til byen, da manglar det ikkje på velvilje og hjelpsamhet.
Som no da vi måtte hente ny forsyning av «Gamle Nordmør»: Det strømma på med ja-ord frå omtenksame venner: Jorid, Bjarne, Gunn, Jan-Øivind og fleire. Jan gjorde omveg og henta, Gunn tok pakken med til korøving i Halsa og songarar kom på døra vår med den!
Enno meir: Dugnadsånda som held kultur og samfunn levande? Plass til berre eksempel her: Kjøkenhjelpene på Sjøbruksmuseet. Loddseljarane for korpset. Korsongarane rundt i bygdene. Eg gir gjerne verbale blomster til «mitt eige» Prosjekt 17!
Førre laurdag var det dugnad utan like på Eidet Bedehus: Til misjonens julemesse kom mange frå fjernt og nær for å yte innsats og gi midlar.
Ei oversett og beskjeden (endatil folkevald!) gruppe er sokneråda våre. Alt dei gjer for å legge til rette så folk har glede av kyrkja si. Alle møta, alle viktige demokratiske løft (ikkje alltid med demokratisk oppfølging). All trivsel som Kari & co skaper ved store tiltak - så vel som hyggeleg kyrkjekaffe! Desse kan kyrkja godt heidre på bibelsk vis!
Samtidig som ein deltek av eiga interesse, viser ein også noko meir: Vilje til å gjera godt, vise omtanke oss imellom. Dette er «empati» – å bry seg rett om kvarandre.
Ein herre som manglar denne sansen, er verdens visstnok rikaste på jordisk gods - Elon Musk. Han meiner, og seier rett fram, at vår største svakhet er nettopp slik omtanke for kvarandre: - The fundamental weakness of Western civilization is empathy.
Ja – ja. Sjølv burde nok han og andre super-egoistar takke empatiske medmenneske for at dei har fått vekse opp under omsorg og vilkår som let dei få bli som dei vart.
Sjølv som nordmøring trur eg at eg talar på vegner av mange med dette lille innlegget. Lat oss vise at vi treng kvarande, løfte kvarandre fram og gjera takken synleg! Og da tenkjer vi ikkje minst på DEG!
God adventstid!
Bernt Gudrunson Bøe
_3.jpg)
