Bøfjordhelg med Fjorddag
Årets Bøfjord-helg består av Kveldheim-treff fredag, kulturlaurdag på Grendahuset og Fjorddag med sundbåtferja «Framnæs» og yrande sjøliv søndag.
Opningstreff på Kveldheim
På Kveldheim fredag byr Bø Grendalag på salgsmesse med tekstil- og keramikkvarer, kosmetikk, bakarvarer og anna. Noko av dette blir også framme på Grendahuset laurdag. Kjøkenet serverer kveldsmat og kaffe før ein avrundar med trekning av dagens utlodning.
Rikhaldig laurdag
Bøfjorden Grendahus er arena for ein rikhaldig laurdag. Åsskard Bygdekvinnelag serverer middag og kaffe og stiller ut «Frukt og bær». Bøfjorden Historielag – hovudarrangør for årets Bøfjordhelg – har utstillinga «Bygda vår gjennom tidene». Private er velkomne med eigne kultur- og hobbyprodukt – gjerne for salg. Ein vil finne måleri av søstrene Gjertrud og Tanja Heggem, foto av Ingrid Sollid, litteratur av Bernt G. Bøe, lokale CD-produksjonar og mykje anna. Historielaget har basarbord heile dagen og tek med takk imot gevinstar til utlodninga.
Kulturfest med «Kardemomme»
I eit variert kulturprogram deltek syngande barn frå Bøfjorden, Peder Hønsvik med gruppa Hjemmelaget, søstrene Maren og Kristine Bøe Holte og Stangvik Jentekor. Desse unge jentene gjorde lykke med Egner-forestillinga «Kardemommefest» på Nordvik i juni. Laurdag kjem altså «folk og røvarar» til Bøfjorden og lagar ståhei. Og alle kan stemme i når det blir «Allsong – på grensa til det koselege»!
Mange gler seg til knøttefotball før kulturfesten og til seniorkampen Bøfjord-Todalen som avslutning på dag 2 av Bøfjordhelga. Bortsett frå billett til Kulturfesten er det fri entre heile dagen.
Fjorddag med «Framnæs»
Søndag blir den årlege Fjorddagen. Hovudattraksjon er sundbåtferja «Framnæs» , som går med passasjerar «I fjordabåtens kjølvann» frå Kristiansund. Frå anløp på Halsa kan nye passasjerar følgje til Bøfjorden – med sving rundt Torjulvågen. Guide fortel om hendingar langs fjorden, og folk er oppfordra til å kle seg «som i fjordadampens dagar». Kaptein på «Framnæs» er for høvet Inge Dønheim.
Båtfolket skaper stemning og liv på fjorden. Historielaget organiserer og premierer fiskekonkurranse, i to klassar – frå land og med båt. Ilabukta på Bø er samlingspunkt - med kafeteria på Saga (pølser, kaffe, is). Det blir lynkurs i kyrkjebåtroing og muleghet for å ro med «Hjelmkonnå» til den gamle handels- og poststaden Skrøvsetvika.
Cruise til Båtvika
Årets fjordcruise med «Framnæs» går frå Ilabukta rundt Bøkleppen og til Båtvika – som på 1800-talet var sjølve fjordsenteret på indre Nordmøre. Langs ruta vil Bernt Bøe fortelje mykje «som ingen skulle tru» om livet på gardar og husmannsplassar her før i tida.
Avslutning på museet
Etter fjordcruiset blir Bøfjordhelga 2015 avslutta med samling på Sjøbruksmuseet – som for øvrig har vanleg opningstid også denne dagen. Publikum blir oppfordra til å samordne kjøring dit. Her blir det m.a eit kort kåseri «Langs fjorden – reise i tid og tradisjon», kaffe, rom for helsingar og premiering av fiskekonkurransen før folk dreg kvar til sitt.
